Arrestohet në Gjakovë i dyshuari që shkeli urdhrin mbrojtës ndaj bashkëshortes, dërgohet në mbajtje

Një person është arrestuar në Gjakovë nën dyshimin se ka shkelur urdhrin mbrojtës të gjykatës, i cili i ndalonte t’i afrohej bashkëshortes së tij. Sipas raportit 24-orësh të Policisë së Kosovës, siç raporton “Betimi për Drejtësi”, rasti është regjistruar më 19 tetor, rreth orës 16:00.

Sipas njoftimit të Policisë, i dyshuari nuk kishte respektuar urdhrin mbrojtës të shqiptuar nga gjykata që të mos i afrohej në perimetrin e caktuar viktimës, bashkëshortes së tij. Për këtë arsye, ai është arrestuar nga zyrtarët policorë.

Rasti është iniciuar si “Mospërfillje e urdhrit të gjykatës”. Me vendim të prokurorit të shtetit, i dyshuari është dërguar në mbajtje, ndërsa hetimet lidhur me rastin po vazhdojnë.

Personi i përmendur në këtë shkrim prezumohet i pafajshëm derisa fajësia e tij të mos vërtetohet me vendim gjyqësor të formës së prerë.