Arrestohet në Kragujevc ish-kreu i Sindikatës Ushtarake të Serbisë, Novica Antiç, pas postimit për “puç” të pretenduar

Në Kragujevc u arrestua sot Novica Antiç, ish-kryetar i Sindikatës Ushtarake të Serbisë, siç njofton agjencia Tanjug, ndërsa edhe gazeta Danas raporton se ka mësuar për arrestimin e tij.

Sipas raportimit të Informer-it, arrestimi u krye me urdhër të Departamentit të Posaçëm për Luftën kundër Krimit të Teknologjisë së Lartë të Prokurorisë së Lartë Publike në Beograd, nën dyshimin se Antiçi ka përhapur informacione të rreme në rrjetet sociale me qëllim shkaktimin e panikut dhe çrregullimit.

Shkak u bë postimi i tij i 15 tetorit në rrjetin X, ku Antiçi shkroi se njësite të Ushtrisë së Serbisë, pak ditë para zgjedhjeve dhe në një periudhë që nuk është parashikuar për stërvitje, po ushtronin veprime taktike të luftimit në vendbanime, në kushte nate. “Këtë e kam kaluar në gusht dhe shtator të vitit 2000. A nuhatet puç?”, shkroi ai ndër të tjera.

Sipas burimeve që citojnë mediat proqeveritare, bëhej fjalë për një aktivitet të rregullt inspektimi të kontrollit të forcave të gatishmërisë, të planifikuar një vit më parë dhe të dokumentuar; një segment i ushtrimit ishte planifikuar në fshatin Stubica, në pjesën e vendbanimit poshtë poligonit, për çka banorët ishin njoftuar me kohë.

Antiçi është një nga kritikët më të zëshëm të pushtetit ndër ish-ushtarakët. Vetëm një ditë më parë, siç raportoi Nova.rs, ai kishte pyetur publikisht se me çfarë baze komandanti i njësisë speciale “Kobre” e siguron Aleksandar Vuçiçin gjatë fushatës zgjedhore, duke e cilësuar atë si shpërdorim të mundshëm të resurseve të Ushtrisë për qëllime politike. Zgjedhjet e parakohshme parlamentare në Serbi mbahen më 25 tetor.

Ministria e Mbrojtjes e Serbisë reagoi po atë ditë, duke theksuar, siç njofton Tanjug, se bëhej fjalë për një inspektim të planifikuar të gjendjes dhe të aftësive operative e funksionale të një njësie speciale, i zhvilluar në rajonin e poligonit “Pasuljanske livade” sipas një plani inspektimi të përcaktuar më parë. Sipas ministrisë, situata taktike e simuluar shërbente për të kontrolluar gatishmërinë e forcave për detyra në mjedis urban, ndërsa për aktivitetin ishin njoftuar paraprakisht Ministria e Punëve të Brendshme dhe organet e vetëqeverisjes lokale.