Bashkëpunimi midis Greqisë dhe SHBA-së është bërë edhe më i fortë dhe forcimi i tij promovon interesat e përbashkëta, por edhe paqen dhe stabilitetin rajonal, deklaroi dje ministri i Jashtëm grek, Nikos Dendias në një takim me sekretarin amerikan të Shtetit, Anthony Blinken, në nisje të takimit të katërt të dialogut strategjik Greqi-SHBA.
Dendias nënvizoi se marrëdhëniet strategjike mes dy vendeve tregojnë interesin e vazhdueshëm të SHBA-së për rajonin tonë për bashkëpunimin dhe mbrojtjen.
Ai nënvizoi se dy vendet kanë vlera të përbashkëta dhe respekt të përbashkët për të drejtën ndërkombëtare.
Duke iu referuar bisedimeve që do të ketë me Blinkenin, ai tha se do të diskutohet për mbrojtjen dhe sigurinë, zbatimin e ligjit ndërkombëtar dhe luftën kundër terrorizmit, sfidat humanitare dhe mjedisore si dhe marrëdhëniet mes popujve.
“Ne do të kemi një dialog të hapur për problemet politike rajonale”, shtoi ai.
Ministri i Jashtëm iu referua edhe rëndësisë gjeostrategjike dhe energjetike të Aleksandrupolisit për Evropën Juglindore.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.