Avioni malajzian, simulatori i pilotit ka një kurs fluturimi mbi oqeanin Indian
Autoritetet australiane bënë të diur se të dhënat e zbuluara në një simulator fluturimi, që zotërohej nga kapiteni i fluturimit “MH370” të “Malaysia Airlines”, tregojnë se dikush e përdori pajisjen për të simuluar një kurs fluturimi në jug të oqeanit Indian, vendi ku besohet se u përplas avioni i zhdukur.
Sipas zyrës australiane të Sigurisë së Transportit, e cila udhëheq kërkimin për avionin fatkeq, simulari tregon qartë se dikush ka hartuar një kurs fluturimi në jug të oqeanit Indian. Nuk dihet nëse ishte vet kapiteni Zaharie Ahmad Shah që e ka bërë këtë, por simulatori zotërohej nga ai dhe gjendej në shtëpinë e tij.
Sipas medieve, ky simulim i dyshimtë ishte bërë më pak se një muaj para se avioni të zhdukej.
Autoritetet thonë se ky zbulim nuk vërteton teorinë e vrasjes dhe vetëvrasjes nga ana e kapitenit që u përfol shumë në javët e para, pas zhdukjes së avionit me 239 njerëz në bord.
Edhe FBI e ka konfirmuar simulimin e gjetur, megjithëse autoritetet malajziane e kanë mohuar këtë.
Fluturimi i përshkruar nga simulatori është i njëjti kurs, që autoritetet morën si të mirëqenë në hetimet e tyre të mëparshme, për të përcaktuar zonën se ku mund të kishte përfunduar avioni. Gjithsesi, dy vite pas zhdukjes, ende nuk është gjetur asnjë gjurmë për avionit fatkeq, diçka që përbën misterin më të madh të aeronautikës moderne.
Zyrtarë malajzianë, kinezë dhe australianë ranë dakord javën e shkuar se kërkimet për të do të ndërpriten, nëse nuk gjenden prova në zonën aktuale të kërkimit, nga e cila kanë mbetur vetëm 10 mijë km katror pa u eksploruar.
