Balaj nderon Vllazninë, shkodranët mposhtin Tiranën në kryeqytet

Vllaznia ka mposhtur Tiranën me një gol të realizuar nga kapiteni i tyre, Bekim Balaj, në ndeshjen e luajtur këtë të diel në stadiumin “Selman Stërmasi”.

Bardheblutë po vuajnë në sfidat e fundit ku nuk kanë gjetur fitoren prej 4 javësh. Edhe ndaj Vllaznisë, Tirana nuk arriti të linte gjurmë dhe u ndëshkua me golin e vetëm të realizuar në pjesën e parë nga Balaj.

Në minutën e 36, një top i prekur me dorë nga Kaina u akordua penallti nga arbitri Kreshnik Cjapi. Nga pika e bardhë u shfaq kapiteni i kuqebluve që nuk gaboi duke dërguar topin në një krah e portierin Leon Kozi në krahun tjetër. Tirana tentoi të reagonte në pjesën e parë, por edhe në fraksionin e dytë, por nuk mundi të gjente të paktën golin e barazimit.

Pas kësaj ndeshje, bardheblutë mbajnë vendin e tretë me 23 pikë, po aq sa Vllaznia e vendit të katërt. Ndërkohë, ndeshja tjetër e luajtur këtë të diel mes Erzenit dhe Teutës është mbyllur në barazim pa gola.