Basha ka një mesazh për Lu: Nuk pres të më tregojë detyrën

Pas mbledhjes së grupit të Partisë Demokratike, kryetari Lulzim Basha theksoi se nesër në seancë “do të votojmë projektligjin për SPAK-un”.

“Falë qëndresës sonë, ligji nesër është në përputhje me standardin që PD-ja ka kërkuar që prej ditës së parë. Saimir Tahiri dhe klanet e drogës, që sot kanë marrë goditje nga sekuestrimi i 20 tonëve drogë, Edi Rama, Ilir Beqja dhe Arben Ahmetaj nesër nuk do e kenë ditë të mirë. Struktura që votohet nesër do të jetë makthi i çdo qeveritari të lidhur me krimin. Ligji për SPAK-un do të mbrojë qytetarët shqiptarë. PD-ja do të ketë aleat të fuqishëm kundër korrupsionit me këtë strukturë”, tha Basha.

Në lidhje me ligjin e “Vetting”-ut, që PD-ja e ka çuar në Gjykatë Kushtetuese, tha: “Nuk biem dakord me paçavuret e mafias dhe korrupsionit. Ligji për “Vetting”-un është antikushtetues dhe ne presim që të çmontohen ato nene antikushtetuese dhe kemi bindjen se kjo do të ndodhë”.

Basha kishte  edhe një mesazh për ambasadorin Donald Lu:

“Nuk pres unë që ambasadori të më tregojë se cila është detyra ime” deklaroi ai.

Pak kohë më parë, ambasadori amerikan në Tiranë, Donald Lu, i kujtoi opozitës se duke bojkotuar Komisionin e Posaçëm të Reformës në Drejtësi dhe dërgimin e ligjit të vetingut në Gjykatën Kushtetuese, do të krijojë idenë në opinionin publik se është partia që është kundër kësaj reforme dhe se po mbron gjyqtarët dhe prokurorët e korruptuar, ose gjyqtarë e prokurorë te të cilët kanë ndikim politik.