Basha në Pogradec: Shteti brenda shtetit po rrjep qytetarët

Kryetari i Partisë Demokratike, Lulzim Basha ka vijuar turin e bashkëbisedimit me banorë të Pogradecit. Papunësia e madhe, rënia e fuqisë blerëse, varfëria, mashtrimi që mazhoranca u bëri për t’iu marrë votat tre vite më parë dhe shkatërrimi i pronave me leje ishin, sipas një njoftimi për shtyp të PD, disa nga shqetësimet që banorët i shprehën zotit Basha.

“Ka një shtet brenda shtetit që merr paratë që duhet t’i merrnit ju. Ka një shtet brenda shtetit që merr paratë që duhet të shkojnë për ilaçe e për pajisje nëpër spitale. Ka një shtet brenda shtetit që merr paratë e pensioneve dhe ato të ndihmës ekonomike. Ka një shtet brenda shtetit dhe ky është Koço Kokëdhima, është Klement Balilaj, është Emiliano Shullazi, Saimir Tahiri, Edi Rama e Arben Ahmetaj. Ka një shtet brenda shtetit, të cilin po nuk e shkatërruam kjo mënyrë do të vazhdojë”, deklaroi Basha gjatë bashkëbisedimit me banorët.

Një ish-minator iu ankua kreut të opozitës se nuk i është dhënë statusi i premtuar nga qeveria, e cila, siç tha ai, po na mashtron me një pension qesharak.

“Po si mund të rritet ekonomia kur gjithë paratë që mblidhen nga taksat shkojnë për luks qeveritar?! 90 milionë euro i kanë bërë orendi për zyra, për zyrat e Shukriut e të shukrive. Paratë do të kthehen në investime dhe jo investime luksi, investime që do të hapin vende pune”, tha më tej Basha.

Tregtarët u ankuan edhe për gjobat e mëdha që u vihen nga tatimorët, të cilët sipas tyre i kontrollojnë deri në 6 herë në ditë dhe kur s’marrin ryshfet vënë gjoba. Përfaqësuesit e biznesit të vogël thanë se, heqja e taksës për ta është zëvendësuar me gjoba sa 3-fishi i taksave që paguanin.