Bashkëpunimi me Italinë, me fokus rritjen e prezencës së investitorëve

Ambasadori i Italisë në Prishtinë, Piero Cristoforo Sardi, gjatë një takimi me ministrin për Integrim Evropian, Bekim Çollaku, konfirmoi gatishmërinë e qeverisë italiane për forcimin e bashkëpunimit biletaral, me fokus në rritjen e prezencës së investitorëve italianë në Kosovë.

Ministri për Integrim Evropian Bekim Çollaku, i uroi mirëseardhjen dhe e falënderoi për mbështetjen që Italia i ka ofruar Kosovës në procesin e shtet-ndërtimit dhe të integrimit në Bashkimin Evropian, duke shprehur bindjen se kjo përkrahje do të rikonfirmohet edhe në procesin e vendimarrjes për liberalizimin e vizave për qytetarët kosovarë.

Gjatë takimit ministri Çollaku e informoi Ambasadorin Sardi rreth axhendës së reformave me fokus në zbatimin e obligimeve të cilat rrjedhin nga Marrëveshja e Stabilizim-Asociimit.

Të dy bashkëbiseduesit vlerësuan se përkundër sfidave të brendshme me të cilat po ballafaqohet Bashkimi Evropian, perspektiva evropiane e vendeve të Ballkanit Perëndimor mbetet e palëkundur, gjë e cila është konfirmuar edhe në Samitin e Parisit në mes të BE-së dhe vendeve të Ballkanit Perëndimor.