BE: Për telekomunikacionin dialogohet deri në një marrëveshje

Kosova dhe Serbia, do të dialogojnë deri në atë pikë derisa të arrihet një marrëveshje e qëndrueshme për telekomunikacionin.

Kështu ka thënë për klankosova.tv, zëdhënësja e Komisionit Europian, Maja Kocijaçiq.

‘’Për çështjen e marrëveshjes së telekomunikacionit, ne do të vazhdojmë të dialogojmë për aq kohë sa është e nevojshme që të dyja palët të arrijnë në një marrëveshje të realizueshme dhe të qëndrueshme për të përfunduar marrëveshjen e vitit 2013’’ ka theksuar ajo.

Sikurse është raportuar edhe më herët për çështjen e kodit telefonik të Kosovës nuk u arrit asnjë rezultat as në raundin e fundit të bisedimeve Prishtinë-Beograd.

Lidhur me takimin e radhës për të njëjtën marrëveshje, Kocijançiq deklaroi se “takimi i ardhshëm sipas BE-së, do të mbahet posa të dyja palët zyrtare të jenë të gatshme për takim’’, njofton Klan Kosova.

Ndërkaq sa i përket marrëveshjeve të arritura në mes të dyja palëve në dialogun e Brukselit, Bashkimi Europian konsideron tejet të rëndësishme zbatimin e tyre madje sipas BE-së është detyrim që duhet përfunduar nga të dyja palët.

‘’Bashkimi Europian iu bën thirrje të dyja palëve për të vazhduar me zbatimin e të gjitha marrëveshjeve të arritura në kuadër të dialogut, duke përfshirë këtu marrëveshjet mbi Telekomunikacionin, Asociacionin e komunave serbe dhe Energjetikës’’, tha Zëdhënsja Kocijançiq.

Deri tani janë zbatuar një numër marrëveshjesh për të cilat ishin pajtuar pala serbe dhe ajo kosovare në dialogun e Brukselit.

Kocijançiq për klankosova.tv ka bërë të ditur po ashtu që marrëveshjet tjera janë në vazhdim e sipër për t’u përmbushur duke shtuar se ‘’punimet në urën e Mitrovicës, pritet të përfundojnë në janar’’, njofton Klan Kosova.