Beqiri: NVM-të, guri i themelit të rritjes së biznesit në Shqipëri

Drejtori i Agjencisë Shqiptare të Zhvillimit të Investimeve, Genti Beqiri, deklaroi se Ndërmarrjet e Vogla e të Mesme janë guri i themelit të rritjes së biznesit në Shqipëri.

AIDA prezantoi të premten Rrjetin Europian të Ndërmarrjeve, një instrument i rëndësishëm në strategjinë e BE-së, me qëllim mbështetjen e ndërmarrjeve të vogla dhe të mesme mbi mundësitë e të bërit biznesit në tregun unik të BE-së.

Pjesëmarrës në panel ishin edhe zv/ministrja e MZHETS-it, Adela Karapici, si dhe përfaqësues të projektit të BE-së e ministrisë së Integrimit. Zv/ministrja Karapici tha në fjalën e saj se pjesëmarrja në këtë skemë është një mundësi për kompanitë shqiptare të cilat synojnë gjetjen e partnerëvë të mundshëm për të bërë biznes në tregjet e Europës dhe më gjerë.

Rrjeti Evropian i Ndërmarrjeve sjell së bashku rreth 600 organizata mbështetëse të biznesit nga më shumë se 60 vende të botës. Rrjeti është bashkëfinancuar nga programi “COSME” i BE-së, i projektuar për të nxitur konkurrencën e ndërmarrjeve evropiane.

Shërbimet e tij janë të përshtatura për NVM-të, por gjithashtu janë në dispozicion për të gjithë bizneset, universitetet dhe qendrat kërkimore. Ky është Rrjeti më i madh në botë që lidh biznesin europian dhe asiston kompanitë të përmirësohen dhe të inovojnë duke kryer partneritete, shkëmbim informacioni, këshillim dhe ekspertizë.