Berisha flet për rizgjedhjen si Kryetar i PD-së: Ishte dita e historisë, pres urime

Kreu i Partisë Demokratike, Sali Berisha, e cilësoi të shtunën si “një nga ditët më të ndritshme të demokracisë në Shqipëri”, gjatë një konference për shtyp këtë të hënë.

Berisha u shpreh se ka një “mirënjohje të pafund” për qytetarët që iu përgjigjën thirrjes së opozitës, pavarësisht, sipas tij, “propagandës agresive të mafies shtetërore” dhe përpjekjeve të mazhorancës për të ndikuar procesin politik.

Ai akuzoi kryeministrin Edi Rama se ka tentuar të përfshijë “eksponentë të botës së krimit” në garën politike, ndërsa kritikoi edhe ish-anëtarë të Partisë Demokratike që kanë krijuar parti të reja politike. Sipas Berishës, këto lëvizje synojnë të favorizojnë mazhorancën.

“Pra, ajo ka qenë ditë e historisë”, deklaroi kreu demokrat.

I pyetur në lidhje me urimet pas zhvillimeve politike të së shtunës, Berisha tha se ka marrë mesazhe urimi nga miqtë e tij dhe se pret të marrë të tjera.

“Kam marrë urime nga miqtë e mi, pres urime, por të jemi të sinqertë, nuk mund të them se unë jam nga ata që çoj shumë urime, kështu që në këtë rast ka një lloj reciprociteti”, u shpreh ai.