Berisha i përgjigjet Ramës: Rezoluta e miratuar nuk ka të bëjë vlerësime, por detyra

Kryedemokrati Sali Berisha i është përgjigjur qëndrimeve të kryeministrit Rama për disa çështje, duke nisur nga integrimi investimet e huaja, apo prokurimet publike.

Berisha iu kundërpërgjigj Ramës në lidhje me rezolutën për integrimin në BE, duke thënë se në përmbajtjen e saj nuk ka asnjë vlerësimin për punën e qeverisë, por vetëm detyra për procesin e integrimit.

“Në monologun e tij, ndër të tjera, u ndal dhe tek rezoluta që u votua në parlament, duke pretenduar se opozita e votoi pasi konstatoi se po zhbllokohet IBAR. Rezoluta nga alfa tek omega nuk ka asnjë fjalë vlerësimi për punën e qeverisë apo të parlamentit, por thjesht rreshton kërkesat dhe detyrat të domosdoshme për procesin e integrimit”, tha Berisha.

Berisha po ashtu dënoi qëndrimet e kryeministrit Rama në takimin e zhvilluar në Talin të Estonisë, duke i cilësuar ato si antishqiptare.

“Në monologun e tij, ai u ndal tek një konferencë e zhvilluar në Talin, ku në mënyrën më të papërgjegjshme krahasoi, pa u skuqur, pa u zverdhur shqiptarët me talebanët, duke u përpjekur të jetë interesant se shqiptarët janë në besimin e tyre të perëndimit si talebanët e Europës”, u shpreh kreu i PD.