Bie niveli i ujit në zonat e përmbytura, në Darzezë rrezik epidemie nga ujërat e zeza

Reshjet kanë pushuar në jug të vendit, çka ka bërë që uji të tërhiqet në zonat e përmbytura për ditë me radhë, por kjo ka nxjerrë në pah një problematikë tjetër në disa nga zonat më të prekura nga vërshimi i ujërave siç është fshati Darzezë, në Fier.

Dalja në sipërfaqe e ujërave të zeza dhe përzierja e tyre me ujërat e mbetura nga përmbytjet masive kanë krijuar një situatë të rëndë për banorët, pasi era e keqe dhe bllokimi i pusetave rrezikon përhapjen e ndonjë epidemie që mund të ketë pasoja të rënda tek banorët e fshatit Darzezë, ndër më të dëmtuarit nga përmbytjet e ditëve të fundit.