‘Bombat në Tiranë’, arrestohet autori i shpërthimeve

Arrestohet autori i serisë së bombave në Tiranë. Policia bën me dije se autori është shtetasi Alfred Qefalia.

Nga të dhënat e fundit mësohet se Qefalia është personi që ka vënë bombat tek farmacia e babait të ministrit të Brendshëm dhe tek zona e ‘Vasil Shantos’, në Tiranë.

Arrestohet dhe personi qe pengoi hetimet
Një 26-vjecar është shoqëruar ditën e sotme si personi që ka dijeni mbi shpërthimet me eksploziv në Tiranë të para 2 ditëve. 26-vjecari Emirjon Ramiz Gjuta është arrestuar nga policia nën akuzën se ka penguar identifikimin e autorëve të vendosjes dhe shpërthimit të eksplozivit tek farmacia e babait të ministrit të Brendshëm dhe kallëpit të tritolit tek zona e ‘Vasil Shantos’.

Gjuta akuzohet se ka penguar zbardhjen e së vërtetës mbi ngjarjet që tronditën Tiranën, ndërsa mësohet se ai ka qenë në mesin e disa të shoqëruarve në polici disa orë pas shpërthimit të farmacisë së Bashkim Tahirit.

Burime nga policia bëjnë me dije se një nga kartat e celularit që u përdor për shpërthim të tritolit ishte në emrin e Emirjon Gjutës.

Edhe në profilin e tij në Facebook, Gjuka ka publikuar si vendodhje të tij në datën 11, Drejtorinë e Policisë së Tiranës. Kurse në datën 12 Shkurt, Gjuta ka publikuar këtë foto nga Drejtoria e Policisë. Ndërsa miqtë e pyesin pse ndodhet aty, ai shprehet se, është duke rezervuar një dhomë.