Burnham ngre Laburistët në sondazhe: Tejkalon Reform Uk të Nigel Farage

Partia Laburiste ka pësuar një rritje të ndjeshme në sondazhe, vetëm një javë pasi Andy Burnham u bë kryeministër, duke barazuar ose duke tejkaluar partinë Reform UK të Nigel Farage.

Reform UK, një parti e krahut të djathtë kundër emigrantëve, kryesonte thuajse në çdo sondazh për më shumë se një vit dhe fitoi qindra vende në zgjedhjet lokale dhe rajonale në maj.

Rezultati i dobët për laburistët çoi në largimin e Keir Starmer dhe zgjedhjen e Burnham si kryetar i partisë dhe kryeministër.

Në javën e parë në detyrë, Burnham hoqi disa taksa për faturat e energjisë, kufizoi tarifat e autobusëve dhe premtoi reforma që do i lehtësonin jetën qytetarëve.

Në një sondazh të Survation, Partia Laburiste kishte një mbështetje prej 26% pas javës së parë të Burnham në detyrë, duke e tejkaluar Reform, e cila vlerësohej me 24%.

Javën para se Starmer të njoftonte dorëheqjen e tij në qershor, Partia Laburiste kishte vetëm 19%, dhe Reform UK 27%.

Anketues të tjerë raportuan një rezultate të ngjashme.

Një sondazh i More In Common, tregoi se Partia Laburiste ishte 28%, ndërsa Reform UK 24%.

Sondazhet e YouGov nxorën Reform UK dhe Partinë Laburiste të barabartë me 22%.

YouGov tha gjithashtu se më shumë britanikë e shihnin Burnhamin si një kryeministër më të mirë se Farage, ose ndonjë udhëheqës tjetër të partisë kryesore.

I pyetur për rritjen e papritur në sondazhe, Burnham tha se ishte i lumtur që e nisi detyrën duke u lidhur më shumë me njerëzit.