“Burgu” grek i refugjatëve, dyndje drejt Selanikut e Athinës

Pas rregullave të ashpra të vendosura nga vendet ballkanike në fundjavë, që u kanë bllokuar lëvizjen drejt destinacionit të tyre, vendeve në veri të Europës, grupe emigrantësh në Greqi kanë nisur të shfaqen shesheve të Athinës.

Sipas Ministrisë së Brendshme greke, rreth 12 mijë vetë kanë “ngecur” në shtetin helen, që kur Maqedonia fqinje nisi të kthente mbrapsht emigrantët afganë në kufi, e ka ngadalësuar ndjeshëm fluksin e kalimit për të tjerët.

Ekzekutivi po planifikon tashmë ngritjen e disa qendrave të përkohshme strehimi, në përpjekje për të menaxhuar krizën.

Komisioneri i lartë i OKB-së për Refugjatët, Filippo Grandi ndodhet në Athinë për takime me zyrtarë të qeverisë, përfshirë edhe vet kryeministrin Alexis Tsipras. Greqia hapi së fundi një kamp të dytë tranziti, të ndërtuar nga ushtria në veri të vendit, ku kufiri është i mbushur me emigrantë të bllokuar.