Çështja ‘Doshi’- PD kallëzon në Prokurori Tahirin dhe Didin

Partia Demokratike dorëzoi të shtunën në Prokurorinë e Përgjithshme kallëzimin penal ndaj ministrit të Brendshëm, Saimir Tahiri dhe ndaj drejtorit të përgjithshëm të Policisë, Artan Didi, për shpërdorim detyre, pengim të zbulimit të së vërtetës, e moskallëzim krimi, të gjithë këto në lidhje me skenarin e porositjes së vrasjes së dy deputetëve, ngjarje për të cilën është akuzuar kryetari i Parlamentit, Ilir Meta.

Sekretari i Përgjithshëm i Partisë Demokratike, Arben Ristani, tha në një deklaratë për mediat pas dorëzimit të kallëzimit penal, se Tahiri dhe Didi janë vënë në dijeni për ngjarjen e rëndë dhe për 6 muaj me radhë nuk kanë ndërmarrë asnjë hap ligjor, madje e kanë mbajtur gjithçka të fshehtë. Ai akuzoi ministrin e Brendshëm se ka kryer veprimet jo si një shtetar dhe jo ashtu siç një shtetari i takonte të vepronte.

“Sigurisht që jo vetëm besojmë në hetimin e plotë të kësaj ngjarje, por edhe e inkurajojmë Prokurorinë e Përgjithshme që të ngrihet në nivelin e duhur ashtu siç i takon një prokurorie të një vendi demokratik dhe të shmanget nga presioni, tensionet politike, apo interesat politike. Unë besoj se mund ta shmangë”, tha Ristani.