Çfarë është një investim financiar online?

Veç kompanive të licencuara nga AMF në tregun tonë operojnë më shumë se 10 kompani të tilla që nuk kanë asnjë licencë.

Burime për gazetën bëjnë të ditur së ato janë të regjistruara në formën e Call Center për shërbime financiare, por pa shpjeguar më tej se çfarë janë këto shërbime që afrojnë për klientët. Dhe rreziku nis pikërisht nga kjo pikë.

Pasi të bëhesh pjesë e këtij tregu, duhet të jesh kompani e madhe me ekspertë të fushës dhe të masësh rrisqet dhe fitimet dhe nuk mundesh që me një telefonatë të investosh paratë e tua, fjala vjen në një pus nafte në anën tjetër të botës, investim që mund ta humbasësh dhe për të cilin askush nuk mban përgjegjësi.

Ekspertë të fushës shpjegojnë për gazetën se “janë më shumë se 10 firma brokerimi fantazëm të palicencuara nga AMF në vendin tonë, cilat ushtrojnë aktivitet në shkelje të ligjeve për titujt në Republikën e Shqipërisë, duke tërhequr investitorët dhe fondet e kursimeve të tyre drejt instrumenteve të panjohura”.

Madje sipas ekspertëve humbjet kanë qenë më të mëdha se fitimet dhe ka pasur raste që investime individësh deri në 70 mijë euro kanë humbur pa u ditur se ky shkuan ato.

Ekspertët e fushës sqarojnë gjithashtu se paratë ikin jashtë vendit dhe kryesisht në zona ofshore, dhe kjo është dhe një mënyrë pastrimi parash.