Clinton, kandidatja që ka marrë më shumë vota se çdo kandidat në histori, përveç… Obama-s
Në shumë shtete numërimi i votave vazhdon ende, kështu që përllogaritja aktuale tregon se kandidatja demokrate Hillary Clinton, për momentin ka arritur 1.7 milionë vota popullore më shumë se Presidenti i zgjedhur Donald Trump, raporton gazeta amerikane USA Today.
Trump do të bëhet presidenti i katërt në historinë e SHBA që merr detyrën pas humbjes së votës popullore.
Nga ana e saj, Clinton ka arritur të marrë “më shumë vota se çdo kandidat presidencial në histori, me përjashtim të Barack Obamas” duke arritur për momentin, 48% të votave, kundrejt 46.7% të Trump, sipas të dhënave të siguruara nga “Cook Political Report”.
Fitorja e republikanit ka bërë që më shumë se 4.5 milionë amerikanë të nënshkruajnë një peticion në faqen e internetit Change.org. Në të u apelojnë delegatëve, të cilët janë të dërguarit nga çdo shtet për të votuar Kolegjin Zgjedhor, që të sfidojnë udhëzimet e dhëna nga votuesit në shtetin e tyre.
Sipas peticionit, ishte demokratja që fitoi votën popullore, kështu që Clinton duhet të jetë presidentja e vendit. “Kolegji Zgjedhor mund të çojë në Shtëpinë e Bardhë secilin prej dy kandidatëve”, kështu që “Pse të mos përdorim këtë institucion më jodemokratik për të siguruar një rezultat demokratik?”, thuhet në peticion.
Në 240 vitet e historisë amerikane ka pasur 157 zgjedhës “jobesnikë”. Pothuajse gjysma e tyre ndryshoi votën sepse kandidati për të cilin ata u zotuan vdiq para se Kolegji Zgjedhor të mblidhej, tre zgjodhën të abstenojnë dhe 82 të tjerë thyen premtimin për arsye personale.
Por askush nuk ndryshoi me sukses rezultatin e zgjedhjeve të përgjithshme, kështu shanset që demokratja të shkojë në Shtëpinë e Bardhë janë jashtëzakonisht të vogla. Rezultati i zgjedhjeve presidenciale të vitit 2016 i ka shtuar benzinë thirrjeve të zjarrta për heqjen e sistemit të Kolegjit Zgjedhor duke e zëvendësuar me votën e shumicës.
Vetë presidenti i zgjedhur Trump e cilësoi “Kolegjin Zgjedhor” një katastrofë për demokracinë gjatë zgjedhjeve të vitit 2012, kur Mitt Romney arriti të kapërcente votën popullore përballë Obamas. Fakti se rreth 2 milionë qytetarë zgjodhën kandidaturën e Clinton është “shumë e rëndësishme për legjitimitetin e Trump”.
Banori i ardhshëm i Shtëpisë së Bardhë do të shërbejë si “presidenti më pak i pranuar dhe i besuar në historinë moderne” të vendit.
Popullariteti i presidentit të zgjedhur varion midis 42% dhe 46%, sipas sondazheve të kryera nga Gallup, “Politico” dhe Morning Consult, respektivisht. Vlerësimi i paraardhësve të tij ishte shumë më i lartë, 58% Bill Clinton në vitin 1992, 59% George W. Bush në vitin 2000 dhe 68% Barack Obama në vitin 2008.
