Çollaku optimist për liberalizimin e shpejtë të vizave

Ministri për Integrime Evropiane, Bekim Çollaku, raportoi sot para komisionit Parlamentar për Integrime, lidhur me raportin e fundit të dërguar Bashkimit Evropian rreth liberalizimit të vizave.

“Sot raportova para komisionit Parlamentar për Integrim Evropian të Kuvendit të Kosovës. Temë e diskutimit ishte procesi i liberalizimit të vizave dhe konkretisht përmbushja e tetë rekomandimeve të fundit të Komisionit Evropian. Deputetëve u paraqita informacione për të gjithë punën që është bërë në përmbushjen e këtyre kritereve, siç i kemi raportuar edhe Komisionit Evropian. I përgëzova deputetët për rolin aktiv mbikëqyrës të këtij komisioni dhe i falënderoj për interesimin dhe kontributin e tyre në çdo hap të këtij procesi të rëndësishëm për qytetarët e Kosovës”, shprehet Çollaku në një postim në rrjetin social Facebook.

Ministri Çollaku tha se “ne jemi gati për liberalizim të vizave dhe besoj se do të rezultojë në lajm pozitiv për viza shumë shpejt”.