David Ellison zoton se kompania e bashkuar Paramount–Warner Bros. do të qëndrojë në Los Angeles: ‘Nuk po lëvizim askund’

Drejtori i përgjithshëm ekzekutiv i Paramount, David Ellison, deklaroi të hënën se kompania e bashkuar Paramount–Warner Bros. Discovery do ta ketë selinë në Los Angeles, duke hequr qafe një herë e mirë spekulimet për një zhvendosje të mundshme të gjigantit të ri mediatik jashtë Kalifornisë.

“Le ta them qartë: kompania e re e bashkuar do të jetë me seli në Los Angeles. Nuk po lëvizim askund. Historia jonë është këtu dhe këtu po ndërtohet e ardhmja jonë,” tha Ellison në deklaratën e tij, duke i dhënë fund javëve të paqartësisë mbi vendndodhjen e ardhshme të studiove.

Deklarata erdhi pak orë pasi u mësua marrëveshja e arritur të hënën në mëngjes me prokurorin e përgjithshëm të Kalifornisë, Rob Bonta, dhe prokurorët e tjerë shtetërorë që kishin paditur për të bllokuar bashkimin prej 110 miliardë dollarësh mes Paramount dhe Warner Bros. Discovery. Megjithëse termat e marrëveshjes nuk kërkonin në mënyrë eksplicite që selia të mbetej në Kaliforni, ato detyronin ruajtjen e operacioneve të studiove përkatëse — një klauzolë që zbuti shqetësimet e lindura pasi Paramount kishte kërcënuar më parë me largimin nga shteti. Madje javën e kaluar raportohej se kompania po shihte prona në Teksas dhe Nashville.

Bonta kishte shprehur veçmas besim se studioja do të mbetej në LA, dhe deklarata e Ellison e konfirmoi këtë, duke i dhënë Hollywood-it sigurinë që priste pas muajsh pasigurie.

Në një memo drejtuar stafit, Ellison tha se bashkimi ka tani “dritë të gjelbër të plotë” dhe se mbyllja e marrëveshjes parashikohet për rreth dy javë, duke hapur rrugën për lindjen e një prej kompanive më të mëdha argëtuese në botë.

Burimi: TheWrap