Davutoglu merr zyrtarisht bekimin e Erdoganit për kryeministër

Presidenti i sapozgjedhur turk Recep Tayyip Erdogan, tha se nesër, ish ministrit të Punëve të Jashtme, Ahmet Davutoglus, do t’i besohet formimi i një qeverie të re.

“Me bekimin e Zotit, nesër Davutoglu-t do t’ia besoj formimin e një qeverie, kabineti i ri i së cilës do të shpallet të premten”, tha Erdogan para turmës së mbështetësve, në prag të një kongresi të jashtëzakonshëm të Partisë për Drejtësi e Zhvillim (AKP), transmeton Telegrafi.

Në kongresin e sotëm, Davutoglu do të nominohet nga partia për kryeministër të ri, pozicion të cilin ai u zgjodh nga kryeministri i mëparshëm Erdogan.

Për më tepër, Davutoglu do të zëvendësojë Erdoganin edhe në postin e kryetarit të partisë AKP.

Funksioni i Presidentit të Turqisë është kryesisht ceremonial, por Erdogan ka njoftuar tashmë se do të përdorë fuqinë, që presidentët e mëparshëm nuk e kanë bërë një gjë të tillë, si në rastin e planifikimit dhe kryesimit të mbledhjeve të kabinetit.