Del Piero nuk jep “receta” për Juven: Nuk më keni dëgjuar dhe s’do të më dëgjoni kurrë të them se…

Gjatë ditës së dytë të “Festivalit të Serie A” në Parma, legjenda e Juventusit dhe kampioni i botës, Alessandro Del Piero, foli për shumë tema, duke ndarë edhe mendimet e tij për situatën aktuale të bardhezinjve.

I pyetur për dashurinë e tifozëve dhe mundësinë për të pasur një rol drejtues te Juventusi, Del Piero u shpreh: “Dashuria dhe pritshmëritë ndaj meje nuk mund të jenë kurrë një peshë. Mund të jenë përgjegjësi, por jo barrë. Kur shoh botën bardhezi, flas gjithmonë me shumë emocion. Lidhja me familjen ‘Agnelli’ ka kaluar momente të veçanta, por ka qenë gjithmonë e sinqertë. Ajo që ka bërë pronësia është e jashtëzakonshme. Ka qenë gjithmonë pranë klubit në momentet e vështira dhe e ka udhëhequr drejt sukseseve të mëdha”.

Për krizën aktuale të Juventusit shtoi: “Emocionalisht është një moment i ndërlikuar, por edhe në vështirësi duhet të shohësh anët pozitive. Duhet të dish të kthesh faqen, edhe duke pranuar gabimet. Jam i bindur se ambienti i Juves e di më mirë se kushdo çfarë duhet korrigjuar”.

Del Piero refuzoi të japë këshilla konkrete për skuadrën: “Nuk më keni dëgjuar kurrë dhe nuk do të më dëgjoni të them se çfarë duhet bërë. Kam respekt të madh për ata që punojnë sot te Juventusi”.

Në fund, ai vlerësoi edhe rivalët: “Como dhe Roma kanë pasur sezon të jashtëzakonshëm. Duhet të marrësh atë që ke dhe të përmirësohesh. Humbjet janë thelbësore, si në futboll, ashtu edhe në jetë. Rruga ka rëndësi dhe goditjet janë pjesë e saj”.