Dëshmitë e rrjetit të Balilit: Do hapnim dyqan sufllaqesh në Holandë

Duke dëshmuar në hetuesi se shkëmbimet e tyre të dyshimta nuk ishin gjë tjetër veçse plane tregtare për eksporte karpuzi dhe blerje dyqanesh me sufllaqe në Holandë, shumica e 15 të arrestuarve, anëtarë të një prej rrjeteve më të mëdha të trafikantëve të lëndëve narkotike nga Shqipëria në Greqi, e më pas në vendet e Europës, i drejtuar dhe financuar nga i ashtuquajturi “baron i Ballkanit”, Klement Balili, kanë mohuar akuzat ndaj tyre.
Sipas 59-vjeçarit Thomas Aleksakis, që akuzohet se bashkë me Dhimitër Potin organizonin nga Brukseli rrjetin në Europë, ose për të depozituar përkohësisht sasitë e drogës, ose për t’i shitur atje, ka deklaruar se synimi i tij ishte koordinimi i importeve të produkteve bujqësore dhe ushqimore nga Greqia dhe vendet e treta për në Holandë.
Edhe 59-vjeçari Mihail Sofronas, specialist për xhepat e kamionëve ku fshihej lënda narkotike, në deponimin e tij thekson se udhëtimet e shumta në Holandë kishin për synim blerjen e një dyqani sufllaqesh.
Por nga ana tjetër, Jorgos Alifantis bashkëpunëtor kryesor i Balilit, ka pohuar se kishte përgjegjësinë e marrjes në dorëzim të ngarkesës para se ta niste për në Europën Qendrore dhe Veriore dhe ka pranuar bashkëpunimin e tij në lidhje me trafikimin e ngarkesës prej 673 kg hashash nëpërmjet Zakinthos.
Ai ka deklaruar madje edhe emrat e tre shtetasve shqiptarë të cilët i ka njohur në 2015 në qytetin e Fierit, me të cilët është marrë vesh për hollësitë e transportit të drogës.
Gjithashtu edhe një pjesëtar tjetër i grupit 33-vjeçari Charalampos Patsiavouras, disa herë shofer i ngarkesave me lëndë narkotike drejt Europës, ka pohuar se njihte prej pesë vitesh bashkëpunëtorin e Balilit , Jorgo Alifantin, i cili i kishte propozuar disa kohë më parë të transportonte në kamionin e tij hashash nga Shqipëria në Holandë.