Deti i Kinës Jugore, Kina e Rusia planifikojnë stërvitje të përbashkët

Ushtria e Kinës ka bërë të ditur gjatë kësaj të enjteje se do të zhvillojë stërvitje të përbashkët me forcat ruse në detin e Kinës Jugore, një njoftim që vjen pas vendimit të kohëve të fundit të Arbitrazhit që refuzonte pretendimet e Pekinit ndaj shumicës së ishujve detarë strategjikë në këto ujëra.

Stërvitja përfshin forcat ajrore dhe ato detare dhe do të zhvillohet diku nga shtatori, teksa ka për synim kryesor thellimin e marrëdhënieve mes dy ushtrive, duke përforcuar kapacitetet e tyre në kundërpërgjigje të kërcënimeve nga deti, bën të ditur zëdhënësi ministror Yang Yujun gjatë një deklarate mujore informuese.

Yang deklaroi gjithashtu se stërvitja nuk ka për shënjestër ndonjë palë të tretë. Ai nuk e zbuloi vendndodhjen specifike se ku do të zhvillohet ajo, ndërkohë që ka edhe zona të detit të Kinës së Jugut, të cilat nuk janë pjesë e mosmarrëveshjeve dhe pretendimeve shumëpalëshe.

Anijet kineze kanë sfiduar shpeshherë anijet amerikane, filipinase dhe ato të shteteve të tjera në ujërat e diskutueshëm, ndërkohë që Kina e konsideron vendimin e Tribunalit të Hagës të dhënë më herët gjatë këtij muaji si të pavlefshëm.

Rusia dhe Kina kanë mbajtur stërvitje të përbashkëta disa herë përgjatë viteve të fundit, të bashkuar nën dëshirën që buron nga superfuqia amerikane në rajonin Aziatiko-Paqësor, edhe pse kanë ende mosmarrëveshje mosbesimi për territore dhe ndikim në Azinë Qendrore.

Rusia është hedhur gjithashtu në mbështetje të refuzimit të Kinës ndaj kërkesës së Filipineve për ta çuar çështjen e detit të Kinës së Jugut në trupën ndërkombëtare të Arbitrazhit në Hagë të Holandës, si dhe argumentoi se vendet pa një pretendim të drejtpërdrejtë mbi territore të caktuara duhet të qëndrojnë të paanshme, referuar këtu Shteteve të Bashkuara, të cilat i kanë bërë thirrje Kinës të pranojë vendimin detyrues të Hagës.