Dhunimi i drejtorit të AKU-së Shkodër, autori në kërkim. Arrestohet bashkëpunëtori i tij

Policia e Shkodrës ka hedhur dritë mbi ngjarjen e ndodhur më 21 maj, ku u dhunua drejtori i Autoritetit Kombëtar të Ushqimit (AKU) në Shkodër, Ramir Haderi.

Në kuadër të hetimeve, është arrestuar Elis Çela, i dyshuar se ka ndihmuar autorin e sulmit duke e transportuar me automjet para dhe pas ngjarjes.

Ndërkohë, policia ka identifikuar edhe personin e dyshuar si autor të drejtpërdrejtë të goditjes ndaj Haderit, i cili është shpallur në kërkim. Forcat e rendit po vijojnë operacionet për lokalizimin dhe arrestimin e tij.

Sulmi ndodhi në lagjen “Rus” të Shkodrës, ku drejtori i AKU-së u godit fizikisht nga një person që më pas u largua nga vendi i ngjarjes. Si pasojë, Haderi pësoi dëmtime në zonën e vetullës dhe mori ndihmë mjekësore.

Hetimet janë ende në zhvillim për të zbardhur plotësisht motivet e ngjarjes. Sipas burimeve hetimore, dyshohet se sulmi mund të ketë lidhje me detyrën e Haderit, ndërsa po verifikohet edhe mundësia e një sulmi të organizuar.

Policia e Shkodrës bën me dije se po punon për identifikimin dhe kapjen e të gjithë personave të përfshirë në këtë ngjarje.