Dibër, vogëlushja 22-muajshe jetonte vetëm e mbyllur në shtëpi, SHSSH e dërgon në jetimore

Një vajzë e vogël, vetëm 22-muajshe jetonte vetëm, e mbyllur në shtëpi. Historia e trishtë e saj nis pas ndarjes së prindërve.

Vogëlushja jeton me babanë, pasi e ëma u largua duke e lënë të vetme. Që prej asaj kohe, babai i saj, Altin Çoku nga fshati Kllobcisht, e mbyll të miturën në shtëpi dhe ikën për të kërkuar punë dhe ushqim.

Ndërsa e vogla rri gjithë ditën brenda në pritje të të atit, askush nuk kujdeset as për ta ushqyer apo për ta vënë në gjumë. Sikur të mos mjaftonte kjo, vajza 22-muajshe jeton në kushte skandaloze.

Mirëpo, duket se i ati nuk ia del më ta mbajë. Ai ka njoftuar policinë që ta marrin të bijën, pasi nuk i siguron dot gjërat më minimale të jetesës. Çoku ka deklaruar se nuk kujdeset dot për vajzën e tij dhe ka kërkuar që ta çojë në një jetimore.

Në lidhje me këtë situatë, ka reaguar edhe Shërbimi Social Shtetëror. SHSHS ka negociuar me të atin dhe është rënë dakord që fëmija të transferohet në shtëpinë e fëmijës në Tiranë. Vajza i është nënshtruar edhe vizitave mjekësore dhe rezulton se ajo ka probleme me shikimin, pasi ka qëndruar për një kohë të gjatë në errësirë.