Dosja për inceneratorin e Elbasanit, shtyhet seanca paraprake për Arben Ahmetajn

Shtyhet për herë të dytë seanca paraprake për ish zëvëndëskryeministrin Arben Ahmetaj për fraksionin e dosjes së incineratorit të Elbasanit.

Shkak u bë mos kthimi i përgjigjes nga të akuzuarit në mungesë për marrjen dijeni për procesin gjyqësor.

Gjykata urdhëroi edhe njëherë njoftimin e të pandehurve në adresat përkatëse, duke caktuar datën 15 qershor për seancën e radhës.

Të pandehur në këtë proces janë Arben Ahmetaj, Erjola Hoxha, Albina Manccka, Mirel Mëriti, Klodian Zoti, Andi Boni, Elda Dinaj, Gerian Kuka, Helidon Begaj, Sonila Goxhaj dhe  Sokol Meqemeja. Kujtojmë se SPAK i ka komunikuar Ahmetajt tre akuza “korrupsion pasiv”, “pastrim parash” dhe “fshehje dhe mos deklarim pasurie”.

Arben Ahmetaj është shpallur në kërkim nga Prokuroria e Posaçme prej muajit korrik të vitit 2023, ndërkohë që organi akuzës ka vendosur në sekuestro disa prona në emër të tij dhe familjarëve të tij.

Ahmetaj ndërkohë po gjykohet në GJKKO edhe në lidhje me veprën penale “shpërdorim detyre” për dosjen “Buka sha”.