Dramë në Qipro, Dinamo reziston 90 minuta dhe barazon 2-2, por pëson dy gola në shtesë dhe eliminohet nga Pafos

Dinamo është eliminuar nga Pafos në Qipro, pas një sfide dramatike që u vendos në kohën shtesë. Blutë e Ilir Dajës barazuan 2-2 në 90 minutat e rregullta, por në shtesë pësuan dy gola dhe nuk arritën të reagojnë.

Dinamo kaloi e para në avantazh që në minutën e 8-të. Pas një aksioni të shpejtë dhe një rrëmbimi fantastik të topit nga Malomo, Silva Richard asistoi për David Fadairon, i cili nuk gaboi përballë portës.

Pafos reagoi menjëherë dhe në minutën e 12-të Ken Sema barazoi me një goditje nga distanca. Topi u devijua dhe përfundoi në rrjetën e Aldo Teqjas. Dinamo protestoi për një faull ndaj Malomos në nisje të aksionit, por arbitri lejoi vazhdimin e lojës.

Pjesa e parë u mbyll në barazim 1-1.

Në minutën e 78-të, vendasit përmbysën rezultatin. Nikolas Ianno realizoi me kokë pas një krosimi në zonë, duke çuar Pafos në avantazh.

Dinamo nuk u dorëzua dhe në minutën e 88-të Silva Richards shënoi golin e barazimit 2-2, pas një topi të ardhur nga goditja e këndit.

Meqë edhe ndeshja e parë kishte përfunduar 1-1, 90 minutat nuk mjaftuan për të përcaktuar skuadrën që do të kalonte më tej.

Në kohën shtesë, Dinamo pësoi edhe dy gola të tjerë nga Pafos. Blutë nuk arritën të rikthehen dhe në fund u mposhtën, duke mbyllur kështu aventurën në këtë përballje europiane.