Dule kërkon census të ri: Nuk dihet se kush janë minoritetet dhe sa janë

Kreu i PBDNJ-së Vangjel Dule u ankua sërish se qeveria nuk respekton të drejtat e minoritetit dhe nuk janë trajtuar me prioritet. Shqetësimin sipas tij e ka ngritur edhe Këshilli i Evropës në rezolutën e 2014. Këto deklarate Dule i ka bërë në Konferencën e 8-të të OMONIA-s, ku një pjesë të saj, ai e ka mbajtur në gjuhën greke.

“Nuk më ka rastisur deri më sot të trajtohen me prioritet të drejtat e minoriteteve. Shoqëria jonë duhet të edukohet me frymën se, të drejtat e minoriteteve janë të shenjta. Kush nuk do donte që Shqipëria të ishte shembull. Do ishim ne të parët që do ta përshëndesnim, por situata nuk është ashtu, e thotë Këshilli i Evropës”, -u shpreh kreu i PBDNJ-së.

Ndërsa në lidhje me censusin e regjistrimit të popullsisë në vitin 2011, Dule tha se ai duhet të bëhet nga e para, pasi minoritarëve iu është mohuar e drejta e vetëdeklarimit. “Gjatë regjistrimit të popullsisë në 2011 është shkelur parimi themelor i nenit 3 në Konventën Kuadër. Kjo konventë përcakton të drejtën e vetëdeklarimit. Kuvendi i Republikës së Shqipërisë ia hoqi këtë të drejtë. Ja pse duhet të merret një census nga e para, që të futen këto të drejta.

Në vendin tonë nuk dihet kush janë minoritetet, ku jetojnë dhe sa janë. Si mund të pretendojë një shtet serioz se na respekton kur nuk e di kush janë, sa janë dhe ku jetojnë. Këto janë elementare”, – u ankua Dule. Gjithashtu ai kërkoi ndryshimin e ligjit për zgjedhjen e këshillit Drejtues të TVSH-së, duke kërkuar që një anëtar i bordit të jetë minoritar.