E shkarkoi nga detyra, Lazimi padit Ekonomin, ministrja: Zbatoj ligjin

Drejtori i shkarkuar i Postës Shqiptare Majlind Lazimi ka paditur ministres e Ekonomisë Milva Ekonomi për largim nga puna pa motiv.

Në një prononcim për mediat, Lazimi theksoi se shkarkimi i tij nuk kishte asnjë motiv, duke e cilësuar si shkelje të ligjit vendimin e ministres Ekonomi.

“Kam bërë një kallëzim në adresë të ministres Ekonomi, për shkelje të plotë të ligjit. Ky është urdhër i paligjshëm dhe kjo ka qenë arsyeja pse kam ardhur këtu.

Nëse do kishte diçka ligjore që unë kam shkelur do ishte e ndershme për të gjithë të jepej arsyeja, nuk kam asgjë të shkruar veç një urdhri për lirim nga detyra, pa motivacion, argumentim. U hap si lajm në media për përfshirje në fushatë, por nuk ka asgjë për këtë, duhet të jepet arsye logjike, qoftë edhe jo ligjore.

Besoj se është e nevojshme që secili të ndjekë argumentet, unë të miat i kam depozituar në prokurori, dhe në Gjykatën Administrative për ta shpallur urdhrin të pavlefshëm”, deklaroi Lazimi.

Ndërkohë ministrja e Ekonomisë Milva Ekonomi ka reaguar në lidhje me shkarkimin e drejtorit të postës Majlind Lazimi.

Ekonomi u shpreh se shkarkimi i tij është bërë brenda të gjitha procedurave ligjore.

“Kam të drejtën që më jep ligji për emërime dhe shkarkimi edhe për shoqëritë anonime. Jam në zbatim të detyrave që më jep ligji”, është shprehur ministrja.

Ndërsa Majlind Lazimi e ka cilësuar vendimin të padrejtë dhe për këtë ka kallëzuar ministren.