El Shara: Siria hiqet nga lista amerikane e shteteve që sponsorizojnë terrorizmin

Presidenti sirian Ahmed al-Shara përshëndeti vendimin e Shteteve të Bashkuara të Amerikës për të hequr Sirinë nga lista e shteteve që mbështesin terrorizmin, duke vlerësuar se ky vendim përfaqëson një hap të rëndësishëm drejt lehtësimit të sanksioneve dhe rimëkëmbjes ekonomike të vendit.

“Sot, Siria po çlirohet nga njollat ​​e errëta dhe po heq kapitullin e dhimbshëm të së kaluarës së saj, në mënyrë që të nisë rrugën e zhvillimit, rindërtimit dhe ripërtëritjes”, tha El Shara në një fjalim, raportoi Al Arabiya.

Vendimi i Uashingtonit përmbysi një përcaktim dekadash të vjetër që përfshinte kufizime të ashpra ekonomike, dhe Departamenti i Thesarit i SHBA-së njoftoi një lehtësim përkatës të sanksioneve.

El Shara shprehu ” mirënjohjen e tij të madhe” ndaj Presidentit të SHBA-së Donald Trump dhe vendeve që, siç tha ai, mbështetën Sirinë.

Autoritetet siriane po kërkojnë të tërheqin investime për të rindërtuar vendin dhe infrastrukturën, të dëmtuara rëndë gjatë më shumë se një dekade lufte civile.

Sekretari i Shtetit i SHBA-së, Marco Rubio, vlerësoi se vendimi i hap Sirisë “rrugën drejt prosperitetit” dhe heq pengesat e fundit të mëdha për investimet në sektorin privat, rimëkëmbjen ekonomike dhe riintegrimin e Sirisë në ekonominë globale.

Ministri i Jashtëm sirian, Assad al-Shaybani, e quajti vendimin një “moment historik”, duke thënë se ai pasqyron “angazhimin e shtetit të ri sirian ndaj paqes dhe sigurisë ndërkombëtare”.Ministri sirian i Financave, Mohamed Barnier, e vlerësoi këtë veprim si një “sukses të diplomacisë siriane”, duke theksuar se ai hap mundësi për një integrim më të madh të Sirisë në sistemin ekonomik dhe financiar global, duke tërhequr investime dhe teknologji moderne dhe duke mbështetur zhvillimin.