Mbrojtja, investimet dhe siguria – Ambasadori amerikan ndan prioritetet e misionit të tij në Tiranë

Ambasadori i ri amerikan në Shqipëri, Eric Wendt, ka bërë të ditura tre prioritetet kryesore të bashkëpunimit mes Shteteve të Bashkuara dhe Shqipërisë gjatë mandatit të tij në Tiranë.

Përmes një video-mesazhi të publikuar në X nga ambasada amerikiane, Wendt thekson se fokusi i tij do të jetë forcimi i bashkëpunimit në fushën e mbrojtjes, zgjerimi i marrëdhënieve tregtare dhe rritja e investimeve me përfitime të ndërsjella për të dy vendet.

Një tjetër prioritet i rëndësishëm, sipas ambasadorit amerikan, do të jetë intensifikimi i luftës ndërkombëtare kundër korrupsionit dhe krimit të organizuar.

Mesazhi i plotë i ambasadorit Eric Wendt:

Ndërsa nis detyrën time si ambasador i Shteteve të Bashkuara të Amerikës në Shqipëri, dëshiroj të shpreh mirënjohjen time për Presidentin Trump dhe Sekretarin Rubio për besimin e treguar ndaj meje. Gjithashtu, dëshiroj të falënderoj popullin shqiptar për mikpritjen e ngrohtë që i keni rezervuar Shteteve të Bashkuara të Amerikës.

Gjatë shërbimit tim të mëparshëm ushtarak, së bashku me Forcat Speciale Shqiptare, si dhe gjatë udhëtimeve të mia nëpër Shqipëri, ku kam takuar qytetarë të zakonshëm shqiptarë, kam përjetuar personalisht faktin se shqiptarët janë një popull jashtëzakonisht mikpritës, punëtor dhe krenar.

Gjatë muajve të ardhshëm, nën drejtimin tim si ambasador, Ambasada e Shteteve të Bashkuara do të zhvillojë një vlerësim, i cili do të ndihmojë në përcaktimin e rrugës sonë përpara.

Në kuadër të këtij vlerësimi, mezi pres të udhëtoj drejt disa qyteteve dhe zonave të Shqipërisë, siç është praktikë e zakonshme diplomatike. Do të marr pjesë në takime të shumta me liderët e ndryshëm politikë që ju keni zgjedhur, si dhe me përfaqësues të qeverisë, drejtues ushtarakë, drejtues të biznesit, përfaqësues të sistemit të drejtësisë dhe drejtues të tjerë.

Gjithashtu, mezi pres të takohem me qytetarë të zakonshëm amerikanë dhe shqiptarë.

Së bashku do të diskutojmë mënyrat tradicionale, por edhe ide të reja dhe krijuese, për të bashkëpunuar në mënyrë sa më efektive në të ardhmen, duke u përqendruar në tri fusha kyçe me përfitim të ndërsjellë për Shtetet e Bashkuara të Amerikës dhe Shqipërinë.

E para është të bëhemi më të fortë. Ne bëhemi më të fortë duke ndërtuar kapacitete reale mbrojtëse dhe duke përmbushur pjesën tonë të drejtë të përgjegjësive si aleatë.

E dyta është të bëhemi më të begatë. Do të gjejmë mënyra për të rritur tregtinë, investimet dhe mundësitë, me përfitime të ndërsjella për amerikanët dhe shqiptarët.

E treta është të bëhemi më të sigurt. Do të bashkëpunojmë në luftën kundër krimit ndërkombëtar dhe për mbrojtjen e interesave tona të përbashkëta.

Ndërsa zhvillojmë këtë vlerësim gjatë muajve të ardhshëm dhe përcaktojmë një rrugë të përbashkët drejt një të ardhmeje më të fortë, më të begatë dhe më të sigurt, mezi pres gjithashtu të mësoj më shumë për popullin shqiptar, për historinë tuaj krenare dhe të përjetoj edhe një herë personalisht mikpritjen tuaj legjendare.

Jam vërtet i nderuar dhe i bekuar që kam mundësinë të shërbej në Shqipëri si ambasador i Shteteve të Bashkuara.

Shtetet e Bashkuara dhe Shqipëria ndajnë një histori të fuqishme, një miqësi dhe një respekt të thellë të ndërsjellë.

Së bashku mund të realizojmë gjëra konkrete.

Ecim së bashku. Shkojmë së bashku.

🇦🇱 Njihuni me Eric Wendt, Ambasadorin e Shteteve të Bashkuara në Shqipëri! Ndiqni mesazhin e tij, teksa ndan prioritetet për t’i bërë të dyja vendet tona më të forta, më të begata dhe më të sigurta. 🇺🇸 Meet Eric Wendt, the U.S. Ambassador to Albania! Watch as he shares his priorities for making both our nations stronger, more prosperous, and safer.