Elbasan, Çapjat qëllojnë ndaj policisë; arrestohen dy anëtarë të familjes
Një konflikti i armatosur ka ndodhur mbrëmjen e së mërkurës në qytetin e Elbasanit, ku disa persona kanë qëlluar me armë automatike në drejtim të policisë.
Ngjarja ka ndodhur pranë parkut “Rinia”, ku të shtënat erdhën nga një mjet tip “Honda” me targë “AA 411 AU”, për fat të mirë pa shkaktuar viktima e as të plagosur.
Drejtoria e Policisë së Elbasanit bën me dije se personat që kanë qëlluar janë pjesëtarë të familjes Çapja, e përfshirë në një hakmarrje prej pothuajse 10 vjetësh me një familje tjetë.
Sipas policisë, që prej masakrës së 3 shkurtit, familja Çapja ishte nën vëzhgimin e agjentëve të krimeve, të cilët u shtuan pas ngjarjes së dy ditëve më parë, kur mbeti i plagosur shtetasi Bledar Muça dhe aksidentalisht një agjente policie, kalimtare e rastit.
Bledar Muça është mik i ngushtë i familjes Çapja dhe mbeti i plagosur edhe gjatë konfliktit të 3 shkurtit, ku tre persona humbën jetën dhe disa të tjerë mbetën të plagosur.
Policia konfirmon se sot anëtarët e kësaj familjeje qëlluan një nga grupet e vëzhgimit të Policisë së Shtetit. Aktualisht, policia ka shoqëruar dy prej tyre, ndërkohë që e gjithë zona është rrethuar dhe po kryhen hetime të mëtejshme.
Forca të RENEA-s dhe specialistë të Krimeve të Rënda kanë mbërritur po ashtu në qytet dhe janë përfshirë në hetime. Të shtënat, të cilat u dëgjuan për disa minuta, shkaktuan panik në qytetin e Elbasanit, duke terrorizuar njerëzit që ndodheshin aty pranë.
