Emrat dhe detajet nga ngjarja në Vlorë, policia: Tre persona morën peng dhe dhunuan 20-vjeçarin për 6 mijë euro

Policia e Vlorës ka dalë me një njoftim zyrtar në lidhje me një rast pengmarrjeje të ndodhur në qytet, ku sqaron se një 20-vjeçar është marrë me forcë në automjet dhe më pas është dhunuar, me qëllim përfitimin e një shume monetare. Sipas policisë, janë identifikuar personat e dyshuar të implikuar në ngjarje.

Në njoftim bëhet me dije se është vënë në pranga një nga autorët, ndërsa dy të tjerë janë shpallur në kërkim ndërsa akuzohen për veprat penale “Rrëmbimi ose mbajtja peng e personit” dhe “Shtrëngimi me anë të kanosjes ose dhunës për dhënien e pasurisë”, të kryera në bashkëpunim.

“Në kuadër të operacionit policor të koduar “STRIKE 2”, specialistët e Seksionit për Hetimin e Krimeve ndaj Personit kanë arrestuar në flagrancë shtetasin Brajan Habazaj, 24 vjeç, banues në fshatin Risili, Vlorë. Ndërkohë, janë shpallur në kërkim shtetasit Roberto Lapa, 30 vjeç, dhe Leandro Kapllani (Lapa), 34 vjeç, vëllezër, të dy banues në të njëjtin fshat.

Nga hetimet paraprake dyshohet se këta shtetas, në bashkëpunim me njëri-tjetrin, kanë marrë me forcë në automjet një 20-vjeçar dhe e kanë dërguar në një ambient të veçuar, ku më pas kanë ushtruar dhunë ndaj tij, me qëllim përfitimin e një shume prej 6 mijë eurosh”, njofton policia.

Policia bën me dije se vijon puna në bashkëpunim me Prokurorinë për dokumentimin e plotë ligjor të ngjarjes dhe për kapjen e dy personave të shpallur në kërkim.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë.