Fabregas sulmon Zanetti-n, trajneri: Për të ardhmen e Paz vendos Como dhe Real-i, Interi ka 0% shanse për ta marrë!

Serie A është 90’ larg mbylljes së sezonit 2025-2026 dhe ajo që ndodh në fushë pritet që të bëjë vend për intrigat e merkatos. Një e tillë ka nisur ku e ardhmja e Nico Paz ka futur në diskutime Como-n dhe Inter-in.

Deklaratat që ka bërë Zanetti duke pranuar interesin e zikaltërve për talentin argjentinas kanë irrituar teknikun e Comos, Cesc Fabregas, i cili sot ka mbajtur një qëndrim të fortë.

“Nico është një lojtar, kartonin e të cilit e zotëron Como dhe Real-i. E vetmja shoqëri që mund të thotë diçka për të ardhmen e tij është Real-i pasi ka 50% të kartonit të tij. Me aq sa di unë Zanetti nuk punon as për Real-in e as për Como-n. Prandaj duhet të ketë kujdes dhe të ketë respekt. Unë jam i bindur se Nico Paz nuk do të jetë një lojtar i Inter-it. Vitin që vjen o kthehet në Madrid ose do të vazhdojë të jetë një lojtar i Como-s”, tha trajneri spanjoll dukshëm i irrituar nga deklaratat e drejtuesit zikaltër.