Familja e pazakontë e Melanie Griffith
Melanie Griffith nuk ka patur një fëmijëri të zakonshme. Ajo është vajza e muzës së Alfred Hitchcock Tipi Hedren, nisi karrierën në kinema kur ishte ende foshnje, 14 vjeç përjetoi romancën me aktorin Don Johnson dhe për më tepër kukulla e saj e fëmijërisë ishte Neil, një luan i stërmadh.
Në kujtimet e familjes është edhe një set gjigant fotografish nga jeta e përditëshme e familjes Griffith dhe pjesëtarit të tyre ekstra, Neil, të cilin e adoptuan gjatë një udhëtimi turistik në Afrikë.
Në foto shihet Tipi duke luajtur me luanin, në një tjetër duke u mbështetur mbi të ndërsa përpara mban gazetën. Nuk mungon as punonjësja e shtëpisë e përjetësuar në një moment teksa kalon mbi luanin gjigant për të kryer detyrat e përditëshme të kuzhinës.
Në një tjetër është Melanie e cila duke luajtur me Neil hidhet në pishinë. Shkrepja krijon imazhin sikur luani ka dashur ta kafshojë, por Melanie sqaron se gjithcka ka qenë pjesë e lojës mes saj dhe kafshës.
Nuk mungon as Noel Marshall, bashkëshorti i atyre viteve i Tipi-t, një agjent me emër hollivudian që më vonë do të prodhonte “The Exorcist”.
