FOKUS – BE ngre alarmin: Zjarret pyjore po afrohen drejt Italisë dhe Greqisë

– Greqia, Italia dhe Evropa Qendrore do të përballen me rrezik të shtuar nga zjarret në javët e ardhshme, duke kërcënuar me fatkeqësi të mëtejshme, edhe pse zjarret vazhdojnë të shpërthejnë në Spanjë dhe Francë, deklaroi kreu i qendrës së reagimit ndaj emergjencave të BE-së, Maria Zuber, shkruan Reuters.

Zuber theksoi  se ”vala e vazhdueshme e nxehtësisë nënkuptonte se ditët e ardhshme do të ishin shumë të vështira” në Francë, por se edhe vendet e tjera duhet të përgatiten për fatkeqësi të mundshme të afërta”.

“Rreziku tjetër, tashmë po zhvendoset në Greqi dhe gjithashtu në Evropën Qendrore,” u tha Zuber gazetarëve.

“Greqia për momentin u kursye dhe tani shohim se do të shkojë në Greqi. Italia do të përballet me rrezik në fillim të gushtit dhe do të duhet të shohim se çfarë do të ndodhë me Gadishullin Iberik, sepse nëse (është) edhe atje, do ta kemi të gjithë Evropën në flakë,” tha ajo.

Parashikimi pasqyron kushtet e motit që ndihmojnë zjarret të ndizen dhe të përhapen me shpejtësi, të tilla si temperaturat e larta, ajri i thatë, era dhe mungesa e shiut.

Evropa përjetoi sezonin e saj më të keq të zjarreve në histori vitin e kaluar, me më shumë se një milion hektarë tokë të djegur.

Zuber tha se ”situata e zjarreve në Evropë këtë vit do të jetë një tjetër rekord”.

Qendra e BE-së koordinon vendosjen e avionëve dhe zjarrfikësve në vendet që kërkojnë mbështetje emergjente, duke u mbështetur në burimet e mbledhura nga vendet evropiane dhe të marra me qira nga BE.

Ajo ka dërguar shtatë aeroplanë dhe katër helikopterë në Francë, dhe gjashtë aeroplanë dhe tre ekipe tokësore të zjarrfikësve në pyje në Spanjë. Jo të gjithë aeroplanët në flotën e BE-së janë aktualisht të zënë, dhe disa janë të para-stacionuar në Evropën Lindore dhe Qendrore, ndërsa rreziku atje rritet, tha Zuber.