Francë, vajzat shkëmbehen në inkubator, ngjarja zbulohet pas 20 vjetësh

Dy vajza të sapolindura janë shkëmbyer në maternitet aksidentalisht, gjykata urdhëron që të dëmshpërblehen me afro 2 milionë euro. Ngjarja ka ndodhur 20 vjet më parë, por prindërit e zbuluan vetëm tani.

Pavarësisht kësaj ata i kanë rritur vajzat me dashuri. Gjykata e qytetit të Grasses, në jug të Francës e detyroi klinikën që kreu gabimin që t’i paguajë të dyja familjet me 1.88 milionë euro, ku secila prej vajzave do të përfitoj nga 400 mijë euro , 300 mijë do të shkojnë për secilin nga prindërit e tyre dhe nga 60 mijë për kokë do tu jepen vëllezërve të dy vajzave.
Kërkesa fillestare për dëmshpërblim ishte 12  milion euro. Historia e Mathild-ës dhe Manon, nisi që në vitin 1994, në një klinikë të Kannes. Foshnjet e sapolindura u diagnostikuan me problemet e verdhëzës dhe u vendosën në të njëjtin inkubator, me sa duket pa byzylyk identifikimit, për një seancë të përbashkët trajtimi. Kur iu dorëzuan prindërve, ata e kuptuan se diçka nuk shkonte ashtu siç duhej, por për shkak të këmbënguljes së mjekëve nuk insistuan. Prindërit shkuan në shtëpi me vajzat e tyre të “gabuara”. E vërteta del në dritë vetëm pas 20 vitesh. Babai i Manon vëren se vajza ishte shumë ndryshe nga pjesa tjetër e familjes dhe për këtë vendosi që të bënte analizat e AND-së.

Përgjigjja ishte shokuese. Ajo nuk ishte vajza e asnjërit prej dy prindërve. Pas kësaj familja lidhi kontaktet me prindërit biologjikë të vajzës dhe të dyja familjet e çojnë çështjen në gjykatë. “ Ajo na ndodhi neve, por më pas mund tu ndodhë edhe çifteve të tjera. Nuk ia uroj askujt që të përjetojë një eksperiencë të tillë”, -komentoi Sophie Serrano, mamaja e Manon, e cila është gjysmë franceze. Ndërkohë asnjëra prej vajzave nuk donte që të braktiste familjen me të cilën u rritën, ndonëse kanë kontakte të përhershme me prindërit biologjikë. Ndërkohë klinika ku ndodhi ngjarja tha se shkaku ishte infermierja, e cila kishte probleme me drogën, e si pasojë e kësaj nuk ka vepruar në përputhje me protokollin.