FSK-ja kërkon përkrahje nga ushtritë e vendeve mike

Intensifikimi i bashkëpunimit të Forcës së Sigurisë së Kosovës me ushtritë e vendeve mike ishte në qendër të konferencës “FSK-ja dhe partnerët e saj”, që u zhvillua sot në Prishtinë.

Në konferencën ku merrnin pjesë përfaqësues të ushtrive të vendeve të ndryshme, u paraqit dhe diskutua puna e FSK-së që nga konferenca e fundit e mbajtur në tetor të vitit të kaluar, si dhe nevojat e saj për ndihmë nga këta partnerë.

Ministri i FSK-së Haki Demolli tha se “konferenca ka për qëllim të koordinojë bashkëveprimin, respektivisht të koordinojë ndihmën dhe përkrahjen, të cilat shtetet mike ia ofrojnë FSK-së në zhvillimin e saj të vazhdueshëm. Po ashtu, gjatë kësaj konference ne kemi prezantuar arritjet që cilat i kemi pasur që nga konferenca e fundit, si dhe prezantuam kërkesat tona në mënyrë që shtetet mike të ndihmojnë dhe përkrahin zhvillimin e FSK-së”, tha Demolli.

 Ai theksoi se në qershor të këtij viti ushtarët e FSK-së do të marrin pjesë në ushtrimet fushore “Anakonda”, të cilat do të zhvillohen në Poloni.

“Arritjet e FSK-së janë të mëdha sepse kemi ftesa të ndryshme si nga KFOR-i ashtu edhe nga Maqedonia, Kroacia dhe Sllovenia, që pjesëtarë të FSK-së të marrin pjesë në aktivitete të ndryshme, në ushtrime ushtarake të ndryshme, qofshin të karakterit rajonal apo ndërkombëtar”, nënvizoi Demolli.

Ndërsa komandanti i FSK-së , Rrahman Rama, theksoi se “kemi nevojë për përkrahjen, eksperiencat dhe përvojat e partnerëve tanë. Ekziston një gatishmëri e jashtëzakonshme e partnerëve tanë që të na ndihmojnë në këtë proces”.

Konferenca “FSK-ja dhe partnerët e saj” mbahet dy herë në vit dhe konferenca e ardhshme do të jetë në muajin tetor.