Fushata zgjedhore në Serbi mbyllet me dy tubime në Beograd, në mesnatë nis heshtja zgjedhore

Fushata për zgjedhjet e parakohshme parlamentare të 25 tetorit në Serbi mbyllet sonte me dy tubime të mëdha në Beograd. Lista “Aleksandar Vučić – Serbia e Bashkuar” tubimin e saj përmbyllës e nisi në orën 16:00 në Halën e Sporteve “Ranko Žeravica” në Beogradin e Ri, ndërsa Lista Studentore – “Studentët fitojnë” tubimin përmbyllës e mban nga ora 18:00 në sheshin Slavija, siç njofton Studio B.

Para dhe brenda Halës së Sporteve u mblodh një numër i madh qytetarësh me flamuj të Serbisë dhe të Partisë Progresive Serbe, si dhe me pankarta “Serbi më e mirë çdo ditë”, “Paqe, stabilitet, përparim” dhe “Zvezdara është me Vučić-in”. Tubimit i janë bashkuar edhe zyrtarë shtetërorë, mes tyre ministrat Adrijana Mesarović, Dragan Glamočić, Nenad Vujić e Aleksandra Sofronijević, si dhe drejtori i Zyrës për Kosovën, Petar Petković. Të mbledhurit kënduan këngën “Ruzmarin” dhe brohoritën emrin e bartësit të listës, Aleksandar Vučić, nga i cili pritet fjalimi kryesor, ndërsa një pjesë e rrugës së Komunës së Parisit pranë hallës u mbyll për qarkullim. Sipas raportimeve të mediave serbe, lista në pushtet sot mbajti tubime në rreth 150 qytete e fshatra në mbarë Serbinë.

Ndërkohë, drejt sheshit Slavija qytetarët dhe studentët po shkojnë në kolona të organizuara nga disa pjesë të kryeqytetit. Kolonat e para u nisën në orën 16:00 nga Sheshi i Aviatorëve në Zemun, nga blloqet e Beogradit të Ri dhe nga parku i madh në Çukaricë, ndërsa në orën 17:00 u nisën edhe kolonat nga Sheshi i Studentëve, Fakultetet Teknike dhe Autokomanda. Kolona nga Zemuni, me pankartën “Zemuni nuk mund të qetësohet”, kaloi nëpër bulevardin Mihajla Pupin e përshëndetur nga qytetarët me brohoritjet “Pumpaj!” dhe “Studentët fitojnë!”, siç njofton portali Naš Portal.

Në Slavija mbrëmë vonë mbërritën edhe kolonat e këmbësorëve të aksionit “Pobeda zove” (Fitorja thërret), të cilat që më 16 tetor u nisën në këmbë nga Zajeçari dhe qytete të tjera të Serbisë. Organizatorët kanë parashikuar në sheshin Dimitrija Tucović një “zonë bashkësie” për personat me aftësi të kufizuara, të moshuarit dhe gratë shtatzëna, si dhe përkthyes të gjuhës së shenjave gjatë fjalimeve.

Në mesnatë, mes të enjtes dhe të premtes, në Serbi fillon heshtja zgjedhore, e cila zgjat deri në mbylljen e vendvotimeve të dielën në orën 20:00. Për 250 vendet e Kuvendit Popullor garojnë 18 lista zgjedhore, ndërsa e drejta e votës u takon 6.450.523 votuesve, të cilët do të votojnë në 8.392 vendvotime, prej tyre 93 jashtë vendit.