Aktgjykimi ndaj prindërve Kecmanoviq dërgohet në Gjykatën e Apelit, prokuroria kërkon dënime më të ashpra

Gjykata e Lartë në Beograd i ka dërguar Gjykatës së Apelit në Beograd dosjen e rastit, së bashku me aktgjykimin e shkallës së parë ndaj Vladimir dhe Miljana Kecmanoviqit dhe me ankesat e mbrojtjes e të Prokurorisë së Lartë Publike të Beogradit, i ka thënë agjencisë Tanjug zëdhënësja e gjykatës Ivona Çoguriq. Gjykata e shkallës së dytë tani do të vendosë për ankesat ndaj aktgjykimit me të cilin çifti u dënua me shumë vite burg.

Gjykata e Apelit mund ta konfirmojë ose ta ndryshojë aktgjykimin, por edhe ta hapë vetë seancën për sqarime shtesë, duke pasur parasysh se kjo gjykatë e kishte anuluar një herë aktgjykimin e parë të shkallës së parë dhe kishte urdhëruar përsëritjen e gjykimit, siç njofton Tanjug.

Me aktgjykimin e shkallës së parë, Vladimir Kecmanoviq u dënua me 14 vjet e gjashtë muaj burg për veprat penale të neglizhimit dhe keqtrajtimit të të miturit dhe të veprës së rëndë kundër sigurisë së përgjithshme, ndërsa Miljana Kecmanoviq u dënua me dy vjet e 11 muaj burg për neglizhim dhe keqtrajtim të të miturit. Vladimiri ndodhet në paraburgim, ndërsa bashkëshortja e tij mbrohet në liri. Gjykata e shpalli Vladimirin fajtor se e kishte mësuar të birin të qëllonte në poligon dhe jashtë tij, si dhe se nuk e kishte siguruar armën në banesë në mënyrën e paraparë me ligj, ndërsa të dy prindërit u dënuan edhe se e kishin neglizhuar rëndë gjendjen psikike dhe emocionale të djalit.

Prokuroria e Lartë Publike e Beogradit ka paraqitur ankesë, duke vlerësuar se në këtë rast nuk ka rrethana lehtësuese. Me ankesë është propozuar që Gjykata e Apelit t’i shqiptojë Vladimirit një dënim të vetëm prej 14 vjet e 11 muaj burg, ndërsa Miljanës tre vjet burg.

Djali i çiftit Kecmanoviq, i cili në kohën e krimit nuk i kishte mbushur 14 vjet dhe për këtë arsye nuk është penalisht përgjegjës, më 1 maj 2023 i mori nga kasaforta dy pistoletat e të atit dhe dy ditë më vonë, gjatë orës së parë të mësimit në shkollën fillore “Vladislav Ribnikar” në Beograd, vrau nëntë nxënës dhe rojën e shkollës dhe plagosi pesë fëmijë të tjerë dhe mësuesen e historisë.