Gati 80% e eksporteve shkojnë drejt tregjeve të BE-së

Gati 80% e eksporteve shqiptare ose 210.5 miliardë lekë patën destinacion tregjet europiane gjatë vitit 2017.

Rritja e eksporteve drejt vendeve të BE-së njohu një rritje prej rreth 11% krahasuar me vitin 2016.

Në total shkëmbimet tregtare me vendet e Bashkimit Evropian, sipas raportit vjetor të INSTAT-it, zënë 66.3%, të gjithë tregtisë.

Ndërsa Italia, fqinji ynë mbetet partneri kryesor tregtar drejt të cilit ne eksportuam mallra me vlerë 146 miliardë lekë, ku vendin kryesor e zënë grupi “tekstile dhe këpucë”.

Ndër vendet e tjera me të cilët Shqipëria ka pasur rritjen më të madhe të eksporteve, në krahasim me 2016-n janë Kosova me (26%) dhe Spanja me (87.5%).

Italia renditet partneri ynë i parë edhe sa i takon importeve, të cilat referon INSTAT u rritën me 5.7% në 2017-n, krahasuar me 2016-n.

Rritje importesh u vërejt dhe nga Turqia me (11.2%) dhe Greqia me (9.2%).