Gërmimet në Kozhle ndërpriten për herë të tretë, Gara: Serbia po e politizon procesin e të zhdukurve

Gërmimet në lokacionin e Kozhles, pranë Novi Pazarit në territorin e Serbisë, janë ndërprerë për herë të tretë pa u përfunduar procesi i kërkimit, siç njofton PortaliFiks. Puna në këtë lokacion, ku dyshohet se ndodhet një varrezë masive e lidhur me luftën e fundit në Kosovë, kishte zgjatur rreth dy javë.

Hapësira ku po kërkohej përdoret ndërkohë nga banorët përreth edhe për hedhjen e mbeturinave. Sipas Komisionit Qeveritar për Persona të Zhdukur, pengesë kryesore për zbardhjen e fatit të të zhdukurve vazhdon të jetë qasja e institucioneve të Serbisë ndaj kësaj çështjeje.

“Lokacioni në Kozhle, por në përgjithësi çdo lokacion apo përpjekje për të adresuar një lokacion në Serbi, shpërfaq më së miri atë qasjen që institucionet e Serbisë kanë kundrejt kësaj problematike, pra një qasje politizuese, e cila po pamundëson respektimin e një të drejte elementare për familjet”, ka thënë Kushtrim Gara nga Komisioni Qeveritar për Persona të Zhdukur.

Sipas Garës, kjo qasje nuk është e re: në disa lokacione në Serbi gërmimet kufizohen në vetëm pak ditë pune, kryesisht në sezonin e vjeshtës, dhe procesi shtyhet nga viti në vit. “E njëjta përvojë ka qenë në Rudnicë të Rashkës, e njëjta përvojë ka qenë në Kizhevak të Rashkës”, ka theksuar ai.

Gara ka theksuar se, pavarësisht punës për më shumë se dy javë, lokacioni në Kozhle mbetet i papërfunduar dhe pjesë e agjendës, ashtu si dhjetëra lokacione të tjera të shënuara në territorin e Serbisë. Serbia, që nga viti 2001, ka potencuar listën e 16 varrezave masive në territorin e saj, ndërsa nga lufta e fundit në Kosovë ende nuk dihet fati i rreth 1 mijë e 500 personave të zhdukur.