Gjermani, arrestohet një ushtarak, dyshohej se po planifikonte sulm terrorist në një qendër azilantësh

Policia gjermane arrestoi një pjesëtar të forcave të armatosura, i dyshuar se po përgatiste një sulm terrorist. Bëhet fjalë për një 28-vjeçar, i cili mban gradën e togerit dhe është pjesë e trupave gjermane të stacionuara në Francë.
Ai u vu në pranga në qytetin e tij të lindjes Ofenbah me urdhër të prokurorisë së Frankfurtit. Autoritetet gjermane dyshojnë se nisur nga motive raciste, ai po planifikonte një sulm ndaj një qendre azilantësh në Gisen, pranë Frankfurtit. Nga hetimet rezulton se ai kishte identitet të dyfishtë. Në dhjetor të 2015-ës ishte regjistruar si refugjat sirian pranë qendrës ku do të kryente sulmin. Por ndërkohë lëvizte nëpër Europë për të kryer detyrën e tij si pjesë e ushtrisë gjermane me pasaportën e vendit të tij.
Policia gjermane ra në gjurmë të aktivitetit të 28-vjeçarit, pasi në janar të këtij viti, ai u ndalua në aeroportin e Vienës pasi po përpiqej të fshihte një armë në tualet. Identiteti i dyfishtë u zbulua nga shenjat e gishtërinjve që iu morën nga policia austriake. Në qendrat e azilantëve, të gjithë refugjatëve u regjistrohen shenjat e gishtërinjve.
Policia gjermane arrestoi edhe një student 24-vjeçar i dyshuar si bashkëpuntor i tij. Gjatë operacionit u kontrolluan 16 objekte në Gjermani, Austri e Francë. Në operacion morën pjesë 90 policë.