Gjermania dhe Austria hapin kufijtë për emigrantët që ndodhen në Hungari

Kancelari austriak ka thënë se vendi i tij dhe Gjermania kanë rënë dakord për të lejuar emigrantët të  kalojnë kufijtë e tyre me Hungaria. Vendimi është bërë publik nga Werner Faymann menjëherë pasi autoritetet në Hungari dërguan autobusë për të transportuar emigrantët që u nisën në këmbë për të arritur në Austri e Gjermani.

Më herët gjatë së premtes, qindra emigrantë në Budapest kanë braktisur zonën e tranzitit dhe janë nisur drejt kufirit me Austrinë dhe Gjermaninë. Bëhet fjalë për një distancë rreth 150 kilometra. Autobusi i parë me emigrantë është nisur drejt kufirit të Hungarisë me Austrinë në orët e vona të së premtes.

Sipas burimit mediatik, 400 persona të tjerë janë arratisur nga kampet e pritjes në lokalitetet Bickse dhe Roszke, përkatësisht 64 dhe 300 persona nga secili kamp.

Në një deklaratë e lëshuar nga kancelari austriak thuhet se vendimi për të lejuar emigrantët është marrë pas bisedimeve që ai ka pasur me Angela Merkel. Gjithashtu bëhet e ditur se emigrantët se emigrantët do të kenë mundësi të aplikojnë për azil.

“Për shkak të situatës së rënduar në kufirin me Hungarinë, Austria dhe Gjermania kanë rënë dakord për të lejuar emigrantët që kanë nisur udhëtimin të futen në territorin tonë”, tha kancelari austriak Werner Faymann.

Në 24 orët e fundit në Hungari kanë mbërritur mbi 3.300 emigrantë, një rekord i ri për fluksin e refugjatëve që mbërrijnë në një ditë të vetme. Ata vijnë kryesisht nga Siria, Afganistani, Pakistani.