Gjiknuri në Leskovik: Do ndërtojmë nënstacion të ri

Ministri i Energjisë dhe Industrisë Damian Gjiknuri dhe administratori i Operatorit të Shpërndarjes Adrian Çela zhvilluan një inspektim në Bashkinë e Kolonjës në kuadër të investimeve që po kryhen në rrjet.

“Ne kemi investuar në sektorin energjitik edhe në Bashkinë e Kolonjës. Jemi sot posaçërisht këtu për të dhënë mesazhin se shumë shpejt, në Buxhetin e ardhshëm të Operatorit të Shpërndarjes do të futet edhe planifikimi për ndërtimin e nënstacionit të Leskovikut që do ti shërbejë qytetit por do ti shërbejë edhe disa investimeve private në fushën e energjisë të cilat do të kenë mundësinë të lidhen me rrjetin e të mos shkaktojnë probleme e humbje si deri më tani”, theksoi Gjiknuri.

Ai deklaroi se shtimi i investimeve në rrjet është produkt i suksesit të reformës në sektorin elektroenergjitik.

“Dua tu them qytetarëve se ky është një tjetër produkt i reformës në energjitikë. Kjo zonë ka qenë paguese e rregullt e energjisë elektrike dhe është veprimi i duhur që tu jepet atyre mbrapsht ajo çka meritojnë”, nënvizoi Gjiknuri.

Ngritja e nënstacionit 110/35/10 KV në qytetin e Leskovikut do të zgjidhë përfundimisht furnizimin me energji të Qytetit Leskovic dhe fshatrave të tij përreth.

Operatori i Shpërndarjes ka planifikuar gjithashtu edhe investime të tjera si riparimin e linjës 35 KV Ersekë Leskovik dhe kthimin e rrjetit të Tensionit të Ulët nga ajror në kabllor.