Gjini Gjoni: Rama më ka vënë pas policinë sikur të isha kriminel

Gjin Gjoni, anëtar i Këshillit të Lartë të Drejtësisë dhe gjyqtar i Gjykatës së Apelit, i akuzuar për fshehje të pasurisë nga ILDKP-ja, ka reaguar sot në mesditë ndaj deklaratës së kryeministrit Edi Rama gjatë paraqitjes së bilancit 300 ditor të punës së qeverisë.

Emri i Gjonit u lakua për disa minuta gjatë fjalimit të kryeministrit, por anëtari i Këshillit të Lartë të Drejtësisë, i ka cilësuar sulmet ndaj tij si tërësisht politike.

“Synimi i sulmeve ndaj meje është vetëm politik, – ka theksuar Gjoni në deklaratën për shtyp para medieve. – Vendimi i KLD-së, për mua plotësisht i drejtë. Kryeministri ka humbur sensin dhe realitetit. Po më bëhet presion dhe po më bëhet shantazh nga kryeministri. Ky është një sulm i paprecedent ndaj meje dhe institucionit ku punoj”.

Më pas Gjoni ka thënë se me urdhër të kryeministrit po përndiqet dhe po i bllokohen bizneset e familjes së tij: “ILDKP dhe ministri nuk paraqiti asnjë provë ndaj meje. Burime nga ILDKP thonë se sulmi ndaj meje është me urdhër të kryeministrit. Kryeministri thotë se s’ka asgjë personale me mua, po si shpjegohet që bizneseve të familjes sime po u bëhet presion nga policia tatimore, me kontrolle të vazhdueshme dhe me presione psikologjike? Meqë zoti kryeministër pretendon se nuk ka asgjë personale me mua, atëherë si shpjegohet që pa asnjë vendim gjyqësor më vë nga mbrapa një duzinë njerëzish të njësisë operacionale të Drejtorisë së Përgjithshme të Policisë, për të më mbajtur në vëzhgim, duke më vënë sinjalizues në makina apo mjete të tjera dhe në ambiente të tjera familjare sikur të isha kriminel.”