Gjykata cakton një muaj paraburgim për të dyshuarin e grabitjes së 8 mijë eurove në Gjakovë

Gjykata Themelore në Gjakovë ka aprovuar kërkesën e Prokurorisë Themelore të Gjakovës dhe i ka caktuar masën e paraburgimit prej një muaji të pandehurit me inicialet Ç. Zh., për shkak të dyshimit të bazuar se ka kryer veprën penale të grabitjes, siç bëhet e ditur në njoftimin e gjykatës.

Sipas kërkesës së Prokurorisë, i pandehuri dyshohet se më 10 tetor 2026, rreth orës 15:00, në rrugën “Anton Çeta” në Gjakovë, te lokali “R. M. T.”, me kanosje serioze për ta sulmuar jetën apo trupin e personit tjetër dhe me qëllim që vetes t’i sjellë dobi pasurore të kundërligjshme, ka përvetësuar pasurinë e të dëmtuarit P. H. nga Gjakova. Ndërsa punëtorja M. F. ishte duke punuar, i pandehuri, i maskuar, është futur në lokal dhe ka nxjerrë një thikë. Nën kërcënimin e thikës e ka urdhëruar punëtoren t’ia japë të gjitha të hollat, por ajo, e frikësuar dhe në panik, nuk ka ditur si të reagojë. Ai ka hapur dollapin ku ndodheshin paratë, ka marrë të gjitha të hollat në shumën prej rreth 8.000 eurosh, i është drejtuar punëtores duke i thënë të mos e shikojë në fytyrë dhe është larguar nga vendi i ngjarjes.

Gjyqtari i procedurës paraprake, Samedin Cena, pas mbajtjes së seancës dëgjimore ka vlerësuar se janë përmbushur kushtet ligjore për caktimin e masës së paraburgimit ndaj të pandehurit. Me këtë vendim, Ç. Zh. do të mbahet në paraburgim për një muaj, periudhë që llogaritet nga data e arrestimit, 15 tetor 2026, deri më 15 nëntor 2026. Palët kanë të drejtë ankese ndaj këtij vendimi në Gjykatën e Apelit të Kosovës.

I dyshuari kishte qenë në arrati pas grabitjes dhe ishte arrestuar më 15 tetor, siç kishte njoftuar më herët Telegrafi. Prokuroria Themelore në Gjakovë kishte marrë aktvendim për fillimin e hetimeve dhe kishte paraqitur kërkesën për paraburgim, të cilën gjykata tani e aprovoi. I pandehuri konsiderohet i pafajshëm derisa fajësia e tij të vërtetohet me vendim të formës së prerë të gjykatës.