KIEV – Zelensky: Ukraina po rimerr territore në lindje të vendit

KIEV, 19 tetor /ATSH-Ukronform/-Presidenti ukrainas Volodymyr Zelensky deklaroi dje në mbrëmje se forcat tokësore ukrainase kanë zmbrapsur trupat ruse në lindje të vendit.

“Po shohim rezultate në frontin e luftës”, tha ai në videomesazh.

“Trendi i këtij viti po vazhdon, që nga fillimi i vjeshtës, ushtarët tanë kanë rimarrë më shumë territore sesa kanë arritur të pushtojnë rusët”, u shpreh Zelensky.

Sipas presidentit ukrainas, qytetet dhe zonat e Dobropillias, Kostiantynivkës, Oleksiievo-Druzhkivkës, Orikhivit, Novopavlivkës, Novoandriivkës dhe Velykomykhailivkës janë nën kontrollin e Ukrainës.

Ai shtoi se trupat ukrainase po mbrojnë gjithashtu zonat pranë Kramatorskut.

Në këto zona, Ukraina ka krijuar një lloj brezi mbrojtës të fortifikuar, me pozicione ushtarake dhe mbrojtje të organizuar, për të penguar përparimin e ushtrisë ruse.

Zelensky tha gjithashtu se trupat ruse janë zmbrapsur në rajonin e Zaporizhias. Këtë zhvillim e kishte konfirmuar së fundmi edhe Instituti për Studimin e Luftës (ISW), një organizatë kërkimore amerikane që analizon zhvillimet ushtarake.

Si Zelensky, ashtu edhe ISW-ja kanë kundërshtuar pretendimet e presidentit rus, Vladimir Putin për suksese të ushtrisë ruse në rajonin e Zaporizhias.

Disa ditë më parë, instituti deklaroi se pretendimet e Putinit ishin aq larg realitetit, saqë ngjanin me halucinacione.

Ukraina po mbrohet prej më shumë se katër vjetësh e gjysmë nga pushtimi në shkallë të gjerë i nisur nga Rusia, me mbështetjen e vendeve perëndimore.

Moska pretendon se disa territore i përkasin Rusisë, ndër to edhe Donbasi, një rajon në lindje të Ukrainës që përfshin kryesisht rajonet e Donetskut dhe Luhanskut dhe që njihet tradicionalisht për minierat e qymyrit. /